Paytaxtın Nizami rayonu Keşlə qəsəbəsində yerləşən evlərdən oğurluq edən şəxslər saxlanılıb. Bu barədə 19 mart tarixində Report məlumat verib.
Məlumatda bildirilib ki, bir necə nəfərin Nizami Rayon Polis İdarəsinə evdən televizor və digər məişət əşyalarının oğurlandığı ilə bağlı müraciətləri daxil olub. Nəticədə polis əməkdaşları tərəfindən şübhəli bilinən, əvvəllər məhkum olunmuş iki nəfər saxlanılıb. Onlar izahatlarında etdikləri oğurluqları etiraf ediblər.
Həmçinin bildirilib ki, sözügedən şəxslər oğurladıqları televizorları digər bir şəxsin köməkliyi ilə onlayn alış-veriş saytlarına yerləşdirib satıblar. Daha sonra onlar əldə etdikləri pulu aralarında bölüblər. Satışa kömək edən şəxs də saxlanılaraq məsuliyyətə cəlb edilib.
Faktlarla bağlı araşdırma aparılır.
