Oğuzda "TIR" qəzaya düşərək yolda qalıb, bu səbəbdən magistral bağlanıb. Bu barədə Report 21 iyul tarixində xəbər verib.
Bu gün saat 11 radələrində Qazaxıstan vətəndaşının idarə etdiyi, 254 AFM 05 Qazaxıstan dövlət qeydiyyat nişanlı yük avtomobili idarəetmədən çıxıb və nəqliyyat vasitəsinin qoşqusu yolun müəyyən hissəsini bağlayıb.
Qəza nəticəsində magistral bağlanıb. Yolun yardımçı hissəsindən istifadə olunur.
Yol Patrul Xidmətinin əməkdaşları əraziyə cəlb olunub. Avtomobillərin hərəkətində ləngimə olsa da, yol polisinin müdaxiləsi ilə yolun yardımçı hissəsindən də istifadə edilməklə nəqliyyatın axını təmin edilir.
Hazırda yük avtomobilinin həmin ərazidən götürülməsi və avtonəqliyyat vasitələrinin hərəkətinin tam bərpa olunması istiqamətində tədbirlər görülür.
