Aprelin 2-dən ölkədə Ramazan ayı daxil olub. Hər il olduğu kimi, bu il də insanların oruc tutmaq məsələsində bir sıra sualları yaranır. Məsələn, oruc tutarkən sahura qalxmaq nə qədər vacibdir? Bu haqda Səhiyyə Nazirliyi açıqlama yayıb.
Mütəxəssis-ekspert Günay İsmayılovanın sözlərinə görə, sahursuz oruc tutmaq sağlamlıq üçün çox təhlükəlidir: “Səhər yeməyi həm aclıq hissini azaldacaq, həm də maddələr mübadiləsinin sürətini qorumağa kömək edəcək”.
O, imsak zamanı yüngül qidalardan, zülalla zəngin süd məhsullarından, yumurta, liflə zəngin yaşıl yarpaqlı tərəvəzlərdən yararlanmağı tövsiyə edib.
“Kəpəkli undan hazırlanmış çörəkdən istifadə etmək olar. Çünki kəpəkli çörək ağ çörəkdən 4 dəfə gec həzm olunur, bu isə uzun zaman ac qalmağa kömək edir”, - deyə qurumun nümayəndəsi bildirib.
Qeyd edək ki, həkimlər xərçəng, vərəm, diabet, xora, zob və astma xəstələrinə, eləcə də hamilə və südverən qadınlara oruc tutmağı ümumiyyətlə məsləhət görmürlər. Bu qrupdan olan xəstələrə ac və susuz qalmaq zərərlidir.
