Özünü jurnalist kimi təqdim edərək vəzifəli şəxslərdən pul tələb etməkdə təqsirləndirilən Bayram Hacıyevin cinayət işi üzrə ibtidai istintaqı yekunlaşıb. Bu haqda aprelin 19-da Report məlumat yayıb.
B. Hacıyev səhiyyə müəssisəsinin direktoru barəsində Facebook-da və YouTube-da "Sizintv.az” və "Vətəndaş Bayram Hacıyev” adlı səhifələrdə həqiqətə uyğun olmayan, nüfuzdan salan videomaterialların silinməsi və bir daha belə paylaşımların edilməməsi müqabilində həmin şəxsdən pul tələb etmişdi.
Bayram Hacıyev eyni əmələ görə digər tibb müəssisələrinin rəhbərinin yaxınları vasitəsilə 2 000 manat pul alarkən cinayət başında yaxalanıb.
Faktlarla bağlı 3 fevral 2022-ci ildə cinayət işi başlanmışdır. O, “təkrar hədə-qorxu ilə tələb etmə” maddəsilə həbs olub.
