Son bir həftə ərzində 521 şəxsə özünüməşğulluq proqramı çərçivəsində mal və materiallar formasında aktivlər təqdim edilib. Bu barədə məlumatı 9 avqust tarixində Əmək və Əhalinin Sosial Müdafiəsi Nazirliyi rəsmi səhifəsində paylaşıb.
Aktivlərlə təmin olunanların əksəriyyəti şəhid ailəsi üzvləri, müharibə iştirakçıları və Vətən müharibəsinin qaziləridir. Onlar verilən mal və material hesabına kiçik müəssisə və təsərrüfatlarını yaradıblar.
Özünüməşğulluq proqramında iştirak etmək üçün Dövlət Məşğulluq Xidmətinin yerli orqanlarında qeydiyyatdan keçmək lazımdır. Nazirlik tərəfindən potensial imkanlara malik şəxslər müəyyən olunur və onlar biznesin təşkili ilə bağlı bir aylıq təlim kurslarına cəlb edilirlər. Kursları uğurla başa vuran şəxslər aktivlərlə təmin olunurlar. Bu aktivlər 2 il müddətinə müqavilə əsasında verilir. Müqavilə müddətinin sonunda təqdim edilmiş aktivlər həmin şəxsin mülkiyyətinə verilir.
2021-ci ilin altı ayı ərzində proqrama 7 min nəfər işsiz və işaxtaran şəxs cəlb edilib.
