Pandemiyadan zərər çəkmiş sahələrdə fəaliyyət göstərən sahibkarlara manatla aldıqları kreditlərə dövlət zəmanəti verilir. Bu məqsədlə 2020-ci ildə İqtisadiyyat Nazirliyi tərəfindən Elektron Kredit Platforması yaradılıb.
Dövlət zəmanəti sahibkarlara müvəkkil kredit təşkilatları tərəfindən ayrılan kreditlərdən yararlanmaq üçün verilir.
Dövlət zəmanətlilə verilən kreditlərin məbləği 3 milyon manatadək, müddəti 3 ilədək, illik faiz dərəcəsi isə 15%-dək təşkil edir. Ayrılan kreditlərin 60%-dək hissəsinə dövlət zəmanəti verilir.
Verilən kreditlərin iki növü var: sürətli (200 min manatadək) və ənənəvi (3 milyon manatadək). Birinci növ üzrə müraciətin baxılma müddəti 7 iş günü, ikinci növ ürzə isə 10 iş günü təşkil edir.
Sahibkarlar kreditdən yararlanmaq üçün “Asan imza” vasitəsilə www.e-edf.gov.az saytından qeydiyyatdan keçməlidirlər.
Pandemiyadan zərər çəkmiş sahələrin iqtisadi fəaliyyət növlərinin siyahısı ilə Sahibkarlığın İnkişafı Fondunun saytında tanış olmaq olar.
2021-ci ilin 31 may tarixinədək Elektron Kredit Platformasına 1026 müraciət daxil olub və 149 milyon manatdan çox dövlət zəmanəti verilib.
