Qrip virusu əhali arasında hər il geniş yayılan bir xəstəlikdir. Bu virus əsasən hava yolu ilə yayılması və insanlardan insana keçməsi ilə tanınır. Qripin əlamətləri arasında yüksək hərarət, boğaz ağrısı, öskürək, əzələlərdə ağrı və halsızlıq yer alır.
Qripin yayılması, xüsusilə qış aylarında daha çox olur. Çünki insanlar daha çox qapalı məkanlarda bir araya gəlirlər. İmmuniteti zəif olanlar, yaşlılar və uşaqlar qripdən daha çox təsirlənə bilərlər. Bəzi hallarda qrip ciddi xəstəliklərə, hətta ölümlərə səbəb olur.
Mütəxəssislər epidemioloji vəziyyətin qarışıq olduğunu, pnevmoniya ağırlaşmalarının çoxaldığını qeyd edirlər. Pnevmoniya ağırlaşmaları infeksiyanın tənəffüs sisteminə və bədənə təsirini artıra bilər.
Bəs görəsən, bununla bağlı hansı tədbirlər görülməlidir?
Mövzu barədə Bakuplus.az–a açıqlama verən həkim-infeksionist Mərdan Əliyevin sözlərinə görə, kəskin respirator virus infeksiyaları payız və qış aylarında artır:
“Artması da təbii haldır. 200-ə qədər virus var. Bunların içərisində ən ağırı isə qripdir. Digərləri daha yüngül formada keçir. Heç qızdırma da çox vaxt müşahidə olunmur. Qrip daha ağır gedir və burada qızdırma, baş, oynaq və əzələ ağrıları, halsızlıq müşahidə olunur. Daha çox bu hallara rast gəlinir. Burun axması, tutulması və asqırma ön planda olur. Yüngül halsızlıq ola bilər. Qızdırma əksər hallarda müşahidə olunmur. Enterovirus, rotaviruslara da rast gəlinir.
Ümumiyyətlə, bu xəstəliklər 5 yaşdan aşağı uşaqlarda və 65+ şəxslərdə daha ağır keçir. Digər qruplarda ağırlaşmalar çox müşahidə olunmur. Belə xəstəliklərə yoluxanda ev şəraitində olmaq, çoxlu maye qəbul etmək, yalnız qızdırma 38+ olarsa dərman qəbul etməlisiz . Bunlara riayət edəndə adətən ağırlaşamalar çox müşahidə edilmir.
Riayət etmədikdə təbii ki, immun sistemi zəif olan şəxslərdə ağırlaşmalar müşahidə oluna bilir. Burada da ən çox ağırlaşma pnevmoniyadır. Virus yuxarı tənəffüs yollarından aşağıya ağ ciyərə daxil olur. Pnevmoniya yaradır. O da çox ağır prosesdir”.
Nəzrin Vahid
