Prokuror ləğv edilmiş Kütləvi İnformasiya Vasitələrinin İnkişafına Dövlət Dəstəyi Fondunun sabiq icraçı direktoru Vüqar Səfərlinin 11 il azadlıqdan məhrum edilməsini istəyib. Bu barədə dekabrın 7-də APA məlumat yayıb.
Həmçinin qurumda müvafiq vəzifələrdə çalışmış şəxslərə cəza istənilib. Onların bəzilərinə 7 il, bəzilərinə isə 2 il cəza verilməsi tələb edilib. Proses dekabrın 14-də davam edəcək.
Qeyd edək ki, sözügedən şəxs Fondun digər əməkdaşları ilə əlbir olub ümumilikdə 18,5 milyon manatın mənimsəməsində və dövlət vəsaitlərinin təyinatı üzrə istifadə edilməməsində şübhəli bilinir. Cinayət yolu ilə əldə edilmiş 5,7 milyon manatı leqallaşdırmasına əsaslı şübhələr də müəyyən edilib.
Vüqar Səfərli və digərləri “mənimsəmə”, “cinayət yolu ilə əldə edilmiş pul vəsaitlərini leqallaşdırma”, “vəzifə səlahiyyətlərindən sui-istifadə”, “vəzifə saxtakarlığı” və digər maddələr ilə ittiham olunub. Onların əmlak və bank əmanətlərinin üzərinə həbs qoyulub. Zərərçəkmiş qismində Medianın İnkişafı Agentliyi tanınıb.
