Qobustan Heyvandarlıq Nümayiş Kompleksinə yeni avropa mənşəli cins damazlıq heyvanlar gətirilib və burada artıq “Murciana” keçilərinin satışına başlanılıb. Bu haqda 10 yanvar tarixində Kənd Təsərrüfatı Nazirliyinin saytında məlumat verilib.
Satışın təşkilində əsas məqsəd fermerlərin cins heyvanlara əlçatanlığına və ölkədə heyvanların cins tərkibinin yaxşılaşdırılmasına nail olmaqdır.
“Murciana” keçilərinin vətəni İspaniyadır. Bu keçilər isti və quraqlıq iqlim şərtlərinə asanlıqla uyğunlaşa bilir. Diri çəkidə erkəklərdə ət məhsuldarlığı 50-60 kiloqram, dişilərdə 30-50 kiloqram, süd məhsuldarlığı isə 500 kiloqram olur.
Qeyd edək ki, Qobustan Heyvandarlıq Nümayiş Kompleksində heyvanların satışı 60% dövlət güzəşti ilə həyata keçirilir. Burada fermerlər üçün satış-sərgi və auksionlar təşkil olunur. Kompleks həftə içi 5 gün, saat 09:00-dan 18:00-dək fəaliyyət göstərir.
