Rusiyada deputatlar əcnəbi işçilər üçün qaydaları sərtləşdirən düzəlişlər hazırlayıblar.
İnsanoid.com-un Gazeta.ru-ya istinadla verdiyi məlumata görə, əmək miqrasiyasının tənzimlənməsi ilə bağlı qanun layihələri paketi "Ədalətli Rusiya - Həqiqət uğrunda" (SRZP) partiyasının lideri Sergey Mironovun rəhbərliyi ilə hazırlanıb.
Yeni qanuna əsasən, miqrantlara ailə üzvləri də daxil olmaqla yaxın qohumlarını yanına aparmaq qadağan olunacaq, həmçinin ixtisassız miqrantlar üçün daimi yaşayış icazəsi və vətəndaşlıq verilməyəcək.
Bundan başqa, əcnəbi işçilərin Rusiya ərazisində qalma müddəti əmək müqaviləsinin müddəti ilə məhdudlaşdırılacaq. Müqavilə başa çatdıqdan sonra işəgötürən miqrantın ölkədən çıxmasını təmin etməlidir.
"Deportasiya halları da daxil olmaqla geri qayıtmanın maliyyələşdirilməsi üçün işəgötürənlər xüsusi depozitdə vəsait yerləşdirməli və ya bank zəmanəti təqdim etməlidirlər. Bu vəsaitlər işçinin vətəninə qayıtması ilə bağlı bütün xərcləri əhatə etməlidir", - deyə Mironov bildirib.
Qanun layihəsində əcnəbi vətəndaşlar üçün imtahanların keçirilməsi məsələlərinə xüsusi diqqət yetirilir. Müşayiətedici sənədlərdə göstərilib ki, rus dili, Rusiya tarixi və qanunvericilik əsasları üzrə test keçirən təşkilatlara bu imtahanların keçirilməsi hüququnu üçüncü şəxslərə və ya fərdi sahibkarlara ötürmək qadağan edilir.
