İdxaldan asılı olan ərzaq və qeyri-ərzaq məhsullarının qiymətlərində artım olacaq. Bu barədə 14 sentyabr tarixində Oxu.Az-a iqtisadi araşdırmaçı Seymur İbadov fikirlərini söyləyib.
“Payız aylarında mövsümi olaraq tərəvəz, meyvə qiymətlərində artım ola bilər”, - iqtisadçı bildirib. Onun sözlərinə görə, qiymət artımı daha çox ölkədə istehsal olunmayan, xaricdən gətirilən və istehsal prosesində digər tamamlayıcı məhsulların istifadəsini nəzərdə tutan mallarda müşahidə olunacaq: “Misal üçün hazırda ölkədə quş ətinin qiymətində müəyyən artım var. Çünki yem məhsullarının bir qismi idxal edilir”.
Seymur İbadovun dediyinə əsasən, qiymət artımının digər səbəbi isə beynəlxalq səviyyədə konteyner çatışmazlığıdır: “Xaricdən alınıb gətirilən məhsullarda daşınma xərclərində kifayət qədər artımlar hiss olunur. Konteyner çatışmazlığı faktiki olaraq daşımalarda yubanmalara, tıxaclara səbəb olur. Bu da konteyner qiymətlərinin artımına gətirib çıxarır”.
Mütəxəssis əlavə edib ki, kompüter, mobil telefon və avtomobil istehsalında çip böhranının yaşanması nəticə olaraq məhsulların qiymətinə öz təsirini göstərə bilər. Yaponiya və Almaniya avtomobil istehsalçıları bəzi ərazilərdə materialların çatışmazlığına görə zavodlarını bağlamaq məcburiyyətində qalıblar. Bu da öz növbəsində avtomobil qiymətlərinin artıma səbəb ola bilər.
