Avqustun 8-də gecə saatlarında Şəmkirin Yeni Həyat kəndində 62 yaşlı qayınata ov tüfəngi ilə oğlunun 36 yaşlı həyat yoldaşını güllələyib. Qarın boşluğundan yaralanan qadın xəstəxanaya yerləşdirilib.
Bu barədə avqustun 8-də Report xəbər verib.
Kənd sakinlərinin sözlərinə görə, ata və oğul arasında mübahisə yaşanıb. Atası ov tüfəngi ilə oğlu tərəfə atəş açıb, amma gəlin həyat yoldaşının qarşısına keçib və güllə ona dəyib.
“Sakit ailə olublar. Amma kişi bəzən içirdi. Yəqin sərxoş olub, əsəbiləşib deyə, bu hal yaşanıb. Qadının qayınatası ilə bir probleminin olduğunu eşitməmişik, sakit qadın idi. Elə qayınatası da kənddə sakit bir insan kimi tanınır. Eşitdik, özümüz də məəttəl qaldıq bu olanlara”, - deyə kənd sakini bildirib.
Faktla bağlı Şəmkir rayon Prokurorluğunda “qəsdən adam öldürməyə cəhd” maddəsi ilə cinayət işi başlanılıb.
