Daxili bazar araşdırması mexanizmindən faydalanmış iki sahibkar istehsala başlayıb. Bu barədə Kiçik və Orta Biznesin İnkişafı Agentliyi (KOBİA) 12 oktyabr tarixində məlumat verib.
Ağıllı ev və bina avtomatlaşdırması sahəsində calışan sahibkar Elşad Hüseynov bildirib ki, bazar araşdırmasına çəkilən xərcin 80%-i dövlət tərəfindən ödənilib. “Daxili bazar araşdırması bizə müvafiq sahədə mövcud vəziyyəti və bu avadanlıqlara olan tələbatı öyrənməkdə dəstək oldu”, - deyə təsisçi əlavə edib.
“Daxili bazar araşdırması mexanizmindən istifadə etməklə termal və yapışqan stiker kağızların istehsalına başladıq. Bununla da müvafiq məhsullar üzrə xaricdən asılılığı 40%-ə qədər azaltdıq”, - dövlət dəstəyindən yararlanmış digər şirkətin rəhbəri Rami Məmmədov söyləyib.
Mikro, kiçik və orta sahibkarlıq subyektlərinin istehsalının stimullaşdırılması məqsədilə hər bir daxili bazar araşdırmalarının aparılmasına dövlət tərəfindən 20 min manatadək vəsait ayrılır. Mikro sahibkarların müraciəti əsasında aparılan araşdırmaya çəkilən xərcin 80%-i, kiçik sahibkarlar üçün isə keçirilən araşdırmanın xərcinin 50%-i dövlət tərəfindən qarşılanır. Orta sahibkarlıq subyektləri isə ödənişsiz təlim və seminarlarla təmin olunur. Sözügedən bazar araşdırmaları ilə KOBİA-nın saytında tanış olmaq olar.
