Samux rayonunun fermerləri xurma bağlarında yetişən məhsulları sata bilmirlər. Satılmayan xurmalar isə zibilliklərə atılır. Buna səbəb bu il məhsullara təklif olunan qiymətlərin onları qane etməməsidir. Məsələ barəsində 3 noyabr tarixində Baku.tv reportaj hazırlayıb.
“Alıcı qüvvəsi zəifdir, malımızı sata bilmirik. Keçən il 2-2,50 manata satılan yeşiklər indi 1-1,50 manatdır. Belə qiymət bizim xərcimizi ödəmir”, - rayon sakini Vahid Vəliyev deyib.
Onun sözlərinə görə, keçən il məhsulu kəndlilərdən almaq üçün rayona 15-16 nəfər gəlirdi. Onların arasında rəqabət olurdu və bu da fermerlərə xurmanı sərfəli qiymətə satmağa imkan verirdi: “Bu il iki nəfər alan var. Belə getsə meyvənin çoxu ağacların başında qalacaq. Demək olar ki, 60%-i heç dərilməyib”.
“Yol xərci çoxdur, yeşik tapılmır, alan yoxdur”, - deyə digər rayon sakini Xatay Vəliyev söyləyib. Onun sözlərinə əsasən, keçən ilki alverçilərin cəmi 10%-i bu il rayona gəlib. O bildirib ki, buna səbəb alıcıların mallarının gömrükdə saxlanılması və həftələrlə oradan buraxılmamasıdır.
Samux rayonunda əsas məşğuliyyətdən biri xurma bağlarında yetişdirilən məhsulların satışıdır. Statistik məlumatlara əsasən, Samux rayonunda ümumilikdə 588 hektar ərazidə xurma bağı salınıb. Təkcə ötən il 9 min tondan çox məhsul yığılıb. Hər il təxminən 7 min tondan artıq xurma Rusiyaya ixrac edilir.
