İtaliyanın Siciliya adası sahillərində batan yaxtada axtarış əməliyyatı zamanı dalğıclar iki meyit aşkar ediblər.
İnsanoid “Reuters”-a istinadən xəbər verir itkin düşənlərin siyahısı altı nəfərdən ibarətdir.
Onlar dünyanın ən böyük investisiya banklarından biri olan “Morgan Stanley International”ın Direktorlar Şurasının sədri, 70 yaşlı Conatan Blumer və onun 71 yaşlı həyat yoldaşı Cudi, 59 yaşlı milyonçu Maykl Linç və onun 18 yaşlı qızı Hanna, “Clifford Chance” firmasının 59 yaşlı vəkili Kris Morvillo və onun 57 yaşlı həyat yoldaşı Nedadır.
Daha əvvəl meyiti dalğıclar tərəfindən aşkar edilən yaxtanın aşpazı Rekaldo Tomasın ölümü təsdiqlənmişdi.
Qeyd edək ki, göyərtəsində 22 nəfərin (12 qonaq və 10 ekipaj üzvü) olduğu 56 metr uzunluğundakı yelkənli “Bayesian” gəmisi avqustun 19-da səhər Palermo şəhəri yaxınlığında batıb. Yaxta Britaniya bayrağı altında üzüb.
