Siyəzəndə atmosfer havasına normadan artıq tullantı atan zavod müəyyən edilib. Bu barədə 24 iyul tarixində Dövlət Ekoloji Təhlükəsizlik Xidməti xəbər verib.
Sözügedən rayonda “2 nömrəli Yol İstismarı” MMC-yə məxsus asfalt zavodundan atmosfer havasına tüstünün yayıldığı aşkar edilib.
Məlum olub ki, zavodda qaz-toz tutucu qurğu quraşdırılmadığı üçün atmosfer havasına normadan artıq tullantı atılıb.
Faktla bağlı zavodun səlahiyyətli nümayəndəsi Xoşbəxt Adıgözəlov barəsində akt, protokol tərtib edilib və o, vəzifəli şəxs qismində cərimələnib. Bundan başqa, təmizləyici qurğunun quraşdırılmasına məcburi göstəriş verilib.
