İsmayıllı rayonunun Albulaq və Qoşakənd kəndlərinin bəzi fermerləri subsidiyaları ala və istifadə edə bilmirlər. Bunu 26 avqust tarixində milli.az Xəzər TV-yə istinadən xəbər verib.
Kənd sakinlərinin sözlərinə görə, adətən subsidiyalardan dekabr ayının sonuna kimi istifadə edirdilər. Hazırda isə onlar nə əkin əkə, nə də ki gübrə ala bilmirlər. Bəzi kənd sakinlərinin kartlarına isə ümumiyyətlə pul köçürülməyib.
“Zəng vurmuşduq qaynar xəttə, oradan bildirdilər ki, indi kartlar çıxarışla verilir”, - kənd sakinlərindən biri söyləyib.
İsmayıllı rayon Dövlət Aqrar İnkişaf Mərkəzinin nümayəndəsi məlumat verib ki, fermerlər bütün lazım olan sənədləri Elektron Kənd Təsərrüfatı İnformasiya Sisteminə (EKTİS) daxil etməlidirlər ki, subsidiya ala bilsinlər.
EKTİS-i 2020-ci ilin yanvar ayının 1-də yaradılıb. Sistemin məqsədi fermerlərə subsidiyaları əlçatan etməkdir. Vəsait “Fermer kart”larına köçürülür. Onun 25%-i nağdlaşdırılan, 75%-i isə nağdlaşdırılmayan vəsaitdir.
Fermerlər elektron sistemdən istifadəyə dair təlimatla linkə daxil olaraq tanış ola bilərlər.
