Ötən bir həftə ərzində İsmayıllı rayonuna yağan qar kəndlərə gedən yolların bağlanmasına səbəb olub. Bu barədə martın 19-da APA məlumat yayıb.
Yüksək dağlıq ərazidə yerləşən kəndlərdə qarın hündürlüyü 1 metrə çatıb. Lahıc, Sərdahar, Müdrüsə, Əhən, Burovdal, Vaşa, Yuxarı Zərnava, Namazgah Güyüm kəndlərində yalnız yük maşınları ilə hərəkət etmək mümkündür.
Bəzi kəndlərdə köhnə elektrik dirəkləri aşıb, naqillər qırılıb və nəticədə enerjinin verilişində fasilə yaranıb.
Bundan əlavə İsmayıllı-Lahıc avtomobil yolunun keçdiyi Niyaldağ silsiləsində qar uçqunu baş verib. Dağlardan gələn qar kütləsi avtomobil yoluna tökülüb və nəqliyyat vasitələrinin hərəkəti dayanıb.
