Aqrar Subsidiya Şurasının qərarına əsasən, qarşıdakı mövsümdə arpa, buğda, çəltik, qarğıdalı, fındıq, çay və limon bitkiləri üzrə subsidiya almaq üçün əkin sahələri sığortalanmalıdır. Bu barədə 15 sentyabr tarixində Kənd Təsərrüfatı Nazirliyinin rəsmi səhifəsində məlumat yayılıb.
Prezidentin imzaladığı fərmana əsasən, ölkənin ərzaq təhlükəsizliyinin təmin edilməsində mühüm rola malik olan bitkilər üzrə 10 hektardan artıq əkin sahələrinə əkin subsidiyaları 3 il ərzində aqrar sığorta olunmaqla veriləcək. Sığortalanacaq məhsulların siyahısı hər il Aqrar Subsidiya Şurası tərəfindən müəyyən ediləcək.
Kənd Təsərrüfatı Nazirliyinin rəsmi səhifəsində dərc edilmiş məlumata əsasən, ölkə üzrə bir hektar taxıl sahəsinin sığorta haqqı 8-12 manat arasında dəyişir. Beləliklə, bu əkin subsidiyasının cüzi hissəsini təşkil edir. Yenilik fermerlərə əlavə ciddi maliyyə öhdəliyi yaratmayacaq.
Aqrar sığorta mexanizmi əkin sahələrini əsas risklərdən – təbii fəlakət, fırtına, qasırğa, dolu, yanğın və üçüncü şəxslərin hərəkətlərindən qoruyur. Qaydalara əsasən, hesablanmış sığorta haqqının 50%-ni fermerlərə dəstək məqsədilə dövlət ödəyir.
Fermerlər əkin sahələrini sığortalamaq üçün əkinlərin bəyanından əvvəl birbaşa olaraq Aqrar Sığorta Fonduna, aqrar sığorta sisteminə daxil olan sığorta şirkətlərinin yerli ofislərinə müraciət edə və ya 1651 nömrəsinə zəng edə bilərlər.
