Təhsil eksperti Kamran Əsədov Dövlət İmtahan Mərkəzi təfərindən keçiriləcək sınaq imtahanının qiymətini şişirdilmiş və əsassız hesab edir. Bu barədə dekabrın 7-də Report məlumat verib.
Dekabrın 19-da Dövlət İmtahan Mərkəzi təfərindən keçiriləcək sınaq imtahanının ödənişi 40 manat təşkil edir. III ixtisas qrupu üzrə imtahan verən abituriyentlər isə coğrafiya fənni üzrə əlavə 15 manat ödəməlidirlər.
Ekspertin sözlərinə əsasən, hazırkı qiymətlər əlçatan deyil.
“DİM hər bir sual kitabçasının hazırlanması üçün resurs sərf edir, amma qoyulan qiymətin bununla əlaqəsi yoxdur. DİM imtahana kənardan dəvət olunan şəxslər üçün pul ödəyir, lakin suallar yenidən tərtib edilmir. Test banklarında olan suallardan istifadə olunur və yalnız 5-6 yeni sual əlavə edilir”, - deyə o vurğulayıb.
DİM nümayəndəsi Xanlar Xanlarzadə isə imtahanlardan əldə olunan vəsaitin qurumun fəaliyyətinə xərcləndiyini söyləyib.
“İmtahanların təşkili xərcləri, test bankının hazırlanması, nəzarətçilərin və digər dəvət olunan şəxslərin əməkhaqları və digər faktorlar imtahan qiyməti müəyyənləşən zaman nəzərə alınır”, - deyə X. Xanlarzadə qeyd edib.
