Təhsil Nazirliyi tələbə təhsil kreditləri ilə bağlı narazılıqlara münasibət bildirərək vurğulayıb ki, sözügedən kredit üçün arayış tələbi yoxdur. Bu barədə 8 dekabr tarixində Trend məlumat verib.
"Kredit sistemindən qeydiyyatdan keçmək üçün 18 yaşından aşağı şəxslərdən "ASAN login" tələb olunmur, onlar notarial ərizə nömrəsi ilə qeydiyyatdan keçə bilərlər. Həmçinin sosial kredit növündə bal tələbi yoxdur”, - qurumdan bildirilib.
Onu sözlərinə görə, standart növdə ilk ilin ilk semestri üçün 300 bal tələbi var. Lakin növbəti semestrlərdə Ümumi Orta Müvəffəqiyyət Göstəricisi nəzərə alınır.
“Kredit almaq üçün müraciət edərkən akademik kəsr olmaması sadəcə son semestr üzrə tələbdir, daha əvvəlki semestrlərdə olması hüquq məhdudlaşdırmır”, - nazirlikdən qeyd edilib.
Sosial təhsil tələbə krediti illik 2%-lə, standart təhsil tələbə kredit isə 6%-lə verilir.
İlk semestrdə tələbə təhsil kreditlərini qəbul imtahanında bakalavriat səviyyəsi üçün 300-700 bal, magistratura səviyyəsi üçün 50-100 bal, subbakalavriat səviyyəsi üçün 110-300 bal toplayanlar ala bilərlər.
