Daxili İşlər Nazirliyinin (DİN) Baş DYP İdarəsinin Müayinə Mərkəzinin əməkdaşları tərəfindən idarə etdikləri yük avtomobillərinin dövlət qeydiyyat nişanlarına müdaxilə edən sürücülər aşkarlanıblar.
Bu barədə İnsanoid DİN-in Mətbuat Xidmətinə istinadən bu gün, 7 sentyabr tarixində xəbər verir.
Məlum olub ki, həmin sürücülər qanunvericiliyin tələblərini pozmuş, "Zil" markalı nəqliyyat vasitəsinə təhkim olunmuş 62-BD-589 dövlət qeydiyyat nişanlarında "9" rəqəmini boya vasitəsilə dəyişərək "8" rəqəminə çevirmiş, 01-BM-688 qeydiyyat nişanlı "Kamaz" markalı nəqliyyat vasitəsinin qeydiyyat nişanına palçıq sürtərək görünüşünü çətinləşdirmişlər. Hər iki sürücü Baş Dövlət Yol Polisi İdarəsinin Xüsusi Tağımının əməkdaşları tərəfindən məsuliyyətə cəlb edilib.
Bu kimi halların yol hərəkəti qaydaları əleyhinə olan inzibati, həmçinin cinayət xarakterli hüquqpozmaların qarşısının alınması və aşkarlanmasında, foto və videoqeydiyyat funksiyasına malik xüsusi texniki vasitələrin köməyi ilə aşkarlanan qayda pozuntuları ilə bağlı elektron qərarların çıxarılmasında ciddi çətinliklər yaratdığı, bununla yanaşı, törədilmiş inzibati xətaya aidiyyəti olmayan şəxslərin haqlı narazılığına səbəb olduğu dəfələrlə qeyd edilsə də, təəssüf ki, hələ də məsuliyyətdən yayınmaq üçün belə uğursuz cəhdlər edən şəxslərə rast gəlinir.
"Bütün bunları nəzərə alaraq, bir daha avtonəqliyyat vasitələrinin sahiblərinə və sürücülərinə müraciət edərək bildiririk ki, dövlət qeydiyyat nişanlarına müdaxilə etmək qanunazid əməldir və inzibati məsuliyyət yaradır", - DİN-in açıqlamasında bildirilib.
