Çinin "TikTok" platforması uşaqlara məxsus məxfiliyi pozduğuna görə milyonlarla funt sterlinq cərimələnə bilər. Bu barədə İnsanoid bu gün, 5 avqust tarixində xəbər verib.
"The Guardian" nəşrinin verdiyi məlumata əsasən, bu barədə Avropa Məlumatların Mühafizəsi Şurası qərara gəlib.
Şura bu qərarı 2021-ci ildə İrlandiya Məlumatların Mühafizəsi üzrə Komissarının başlatdığı araşdırmadan sonra qəbul edib.
O, "TikTok"un Aİ-nin ümumi məlumatların qorunması qaydalarına uyğunluğunu və platformanın 13-17 yaşlı uşaqların məlumatlarını necə idarə etdiyini nəzərdən keçirib.
Cərimənin dörd həftə ərzində veriləcəyi gözlənilir.
Aİ-nin rəqəmsal xidmətlər haqqında qanununa əsasən, "TikTok", feysbuk və digər iri onlayn platformalar qanunsuz məzmuna nəzarət etməli, müəyyən reklamları qadağan etməlidirlər.
Bu ilin əvvəlində "TikTok" valideynlərin razılığı olmadan platformadan istifadə edən 13 yaşından aşağı təxminən 1,5 milyon uşağın məlumatlarının qanunsuz emalına görə 12,7 milyon funt sterlinq (14,7 milyon avro) cərimələnib.
