Rumıniyada prezident seçkilərinin birinci turunda, sorğulara görə yalnız altıncı yeri gözlənilən ultra-sağçı siyasətçi Kalin Corceşku gözlənilməz şəkildə qalib gəlib.
İnsanoid.com xarici KİV-ə istinadən xəbər verir ki, o, 23%-ə yaxın səs toplayaraq seçicilərin şüurunda "şok edici bir oyandırma" olduğunu vurğulayıb. Seçki proqramında yerli fermerlərin dəstəklənməsi, idxaldan asılılığın azaldılması və NATO-nun tənqidi var. Siyasətçi kampaniyasını "TikTok" sosial şəbəkə hesabında apararaq yüz minlərlə izləyici topladı.
Əvvəlcə birinci turda qalib gələcəyi gözlənilən Rumıniyanın baş naziri, sosial-demokrat Marçel Çolaku isə ikinci yerə belə çıxa bilməyib. O, liberal "Rumıniyanı Xilas Etmək Hərəkatı" partiyasından olan keçmiş jurnalist Elena Laskoniyə səsdə az bir fərqlə uduzub və öz partiyasının başçılığı vəzifəsindən istefa verib.
Rumıniyada siyasi gərginlik artmaqda davam edir. Seçkilərin ikinci turu isə 8 dekabrda, parlament seçkilərindən bir həftə sonra keçiriləcək.
