Türk Hava Yollarının təyyarəsində intihar hadisəsi baş verib. Bu barədə İnsanoid Hava Yolları Şirkətinin Mətbuat Xidmətinə istinadən bu gün, 26 iyul tarixində xəbər verir.
Ötən gün yerli vaxtla saat 12:40-da İstanbul Hava Limanından Mərakeşə getmək üçün havaya qalxan Türk Hava Yollarına (THY) məxsus Boeing 737-MAX8 tipli TK 619 təyyarəsi Əlcəzairdə məcburi eniş edib.
Türk Hava Yollarının Mətbuat Xidmətindən alınan məlumata görə, təyyarədə adı açıqlanmayan sərnişin havaya qalxdıqdan az sonra tualetə gedib. Sərnişin uzun müddət tualetdən çıxmadıqdan sonra kabin işçiləri vəziyyətdən şübhələnərək qapını açıblar.
İşçilər tərəfindən tualet açılanda sərnişinin intihar etdiyi məlum olub. Tualetdən çıxarılan sərnişinə əvvəlcə kabin heyəti, daha sonra isə təyyarədə gedən həkim tərəfindən tibbi yardım göstərilib. Təyyarə saat 15:15 radələrində Əlcəzairdə məcburi eniş edib. Təyyarəyə gələn həkimlər sərnişinin öldüyünü müəyyən ediblər.
Hadisə ilə bağlı araşdırma aparılır.
