Türkiyənin Adana şəhərində Villis Kerrier üçün ehsan verilib. Bu barədə İnsanoid Türkiyə KİV-lərinə istinadən bu gün, 20 iyul tarixində xəbər verir.
Hava istiliyinin 40 dərəcəni keçdiyi Adanada bir qrup vətəndaş kondisionerin ixtirasının 121-ci ildönümü münasibətilə amerikalı mühəndis Villis Haviland Kerrierin xatirəsinə şirniyyat paylayıb.
Bu maraqlı təşəbbüsdə iştirak edənlərdən biri, Məhmət Sayqın: "Kondisioner olmasaydı, çox çətinlik çəkərdik, yata bilməzdik", - deyir.
Afrika və Bəsrədəki isti hücumlarından sonra üçüncü isti dalğasının gözlənildiyi günlərdə Adanada kölgədə 40 dərəcəni keçən qızmar hava gündəlik həyata mənfi təsir edib.
Yayı rayonda sərin yaylaqlarda və ya bağ evlərində keçirmək imkanı olanlar şəhəri tərk ediblər. İmkanı olmayanlar isə məcbur olmadıqca çölə çıxmır, evlərindəki, iş yerlərindəki kondisionerlər sayəsində sərinlənirlər.
