Ucarın Təzə Şilyan kəndində orta məktəbin tavanı dərs zamanı çöküb. Bu barədə yanvarın 12-də kənd sakinləri Report-a məlumat veriblər.
Onların sözlərinə görə, məktəb qəzalı vəziyyətdə olduğu üçün valideynlər uşaqlarını oraya göndərməkdən çəkinirlər.
"Bir neçə gün öncə dərs zamanı otaqlardan birinin tavanı çöküb. İkinci mərtəbədən mişar daşları otağa tökülüb. Çox şükür ki, həmin vaxt otaqda heç kim yox idi. Buna görə də xəsarət alan olmayıb", - deyə sakin vurğulayıb.
Məlumata əsasən, 2000-ci ildə Təhsil nazirliyinin sifarişi ilə inşa olunmuş məktəb tikintisi tam bitməmiş təhvil verilib.
Ucar Rayon Təhsil şöbəsinin müdiri Rauf Məmmədov bildirib ki, aidiyyəti qurumlar məktəbin qəzalı vəziyyətdə olması ilə bağlı məlumatlandırılıb. Həmçinin o, məktəbin təmir edilməsinin yaxın zamanlarda gözlənilmədiyini qeyd edib.
Məktəbin şagirdlərinin sayı 300-dən çox, müəllimlərinin sayı isə 25 nəfər təşkil edir.
