Manatın məzənnəsinin dəyişməsi birbaşa Mərkəzi Bankın mövqeyindən asılıdır. Bu barədə iqtisadçı-ekspert, millət vəkili Vüqar Bayramov 13 yanvar tarixində öz Facebook səhifəsində paylaşım edib.
Onun sözlərinə görə, son günlərdə yerli banklarda dolların alış kursunun artması bankların özündə xarici valyutaya olan tələbin yüksək olması ilə əlaqəlidir. O, qeyd edib ki, ötən ilin ilk 11 günündə Mərkəzi Bank banklara 137 milyon dollar satıb. Bu ilin eyni dövründə isə bu rəqəm 60% artaraq 227,2 milyon dollar təşkil edib.
Millət vəkilinin sözlərinə görə, ilin sonunda valyuta tələbinin yüksək olması təbiidir. Buna səbəb xarici səfərlərin sayının artmasıdır, dövlət və özəl qurumlarının xarici borc öhdəliklərinin yerinə yetirilməsidir, bayramlarla əlaqədar idxala tələbin artmasıdır.
“Bununla belə, dolların nağd satış kursunun ciddi dəyişməməsi isə ondan xəbər verir ki, biznesdən kənar valyuta tələbi hələlik yüksək deyil”, - deyə Vüqar Bayramov əlavə edib.
