Vətən müharibəsi iştirakçılarına “Müharibə veteranı” adı, vəsiqəsi və təqaüdünün verilmə qaydaları açıqlanıb. Bu haqda 8 yanvar tarixində Əmək və Əhalinin Sosial Müdafiəsi Nazirliyinin saytında məlumat verilib.
Belə ki, 2020-ci il sentyabrın 27-dən noyabrın 10-dək ölkəmizin ərazi bütövlüyü uğrunda döyüşlərdə iştirak etmiş şəxslərə “Müharibə veteranı” adı və vəsiqəsi xidmət keçdikləri (qulluq etdikləri, işlədikləri) qurum tərəfindən veriləcək. Hazırlanan siyahı Nazirlər Kabineti ilə razılaşdırılacaq.
Daha sonra toplanılan məlumatlar Əmək və Əhalinin Sosial Müdafiəsi Nazirliyinin “Zəfər” altsisteminə daxil ediləcək. Sözügedən Nazirlik tərəfindən isə müharibə iştirakçılarına 80 manat məbləğində Prezidentin aylıq təqaüdü təyin olunacaq.
Təqaüdün təyinatı üçün vətəndaşdan heç bir sənədin təqdim edilməsi tələb olunmur. Proses e-sistem üzərindən proaktiv qaydada həyata keçiriləcək. Bank kartının hansı bankdan alacağı barədə müharibə veteranlarına sms vasitəsilə məlumat veriləcək.
Hansı ayda təyin edilməsindən asılı olmayaraq, təqaüd 2022-ci ilin 1 yanvar tarixindən hesablanaraq vətəndaşın bank kartına köçürüləcək.
Qeyd edək ki, Vətən müharibəsi iştirakçılarına “Müharibə veteranı” adının, vəsiqəsinin verilməsi və Prezidentin təqaüdünün təyin edilməsi barədə Sərəncəm 29 dekabr 2021-ci ildə imzalanmışdır.
