Bundan sonra icbari sığorta olunanlar ixtisaslı həkim (kardioloq, uroloq, oftalmoloq, endokrinoloq və s.) müayinəsi üçün göndəriş vərəqəsi olmadan istənilən dövlət tibb mərkzlərinə müraciət edə biləcəklər. Bu haqda 22 dekabr tarixində İcbari Tibbi Sığorta üzrə Dövlət Agentliyinin saytında məlumat verilib.
Bu tibb müəssisələrinə rayon/şəhər mərkəzi xəstəxanaları, müalicə-diaqnostika mərkəzləri, birləşmiş şəhər xəstəxanaları, birləşmiş uşaq xəstəxanaları, şəhər klinik xəstəxanaları, vərəm əleyhinə tibb müəssisələri, habelə Kliniki Tibbi Mərkəz, Akademik M.Ə.Mirqasımov adına Respublika Klinik Xəstəxanası, M.A.Topçubaşov adına Elmi Cərrahiyyə Mərkəzi, Elmi-Tədqiqat Mamalıq və Ginekologiya İnstitutu və s. tibb müəssisələri aiddir.
Sığortaolunanlara tibbi xidmət yalnız yaşadıqları yer üzrə fəaliyyət göstərən tibb müəssisəslərində deyil, ölkənin müxtəlif şəhər və rayonlarındakı tibb müəssisələrində də göstəriləcək. Vətəndaşa tələb olunan tibbi xidmət Xidmətlər Zərfinə daxildirsə, ona icbari tibbi sığorta çərçivəsində ödənişsiz yardım göstəriləcək.
Qanunun müvafiq müddəaları qüvvəyə minənədək, göndəriş vərəqəsi yalnız stasionar şəraitdə göstərilən tibbi xidmətlər üçün tələb olunacaq. Bu vərəqəni almaq üçün ailə həkiminə (sahə həkimi-terapevti, sahə həkimi-pediatrı) və ya ixtisaslı həkimə (müalicə həkimi) müraciət etmək lazımdır.
Dövlət tibb müəssisələrində tibbi xidmətin göstərilməsi mümkün olmadıqda sığortaolunan özəl tibb müəssisəsinə yönləndirilir. Pasiyent göndəriş vərəqəsi olmadan özəl tibb müəssisələrinə birbaşa müraciət etdikdə tibbi xidmətdən öz vəsaiti hesabına yararlanır.
