Yeni il bayramını kimi hoteldə, kimi restoranda, kimi isə evdə keçirmək istəyir. “İnsanoid” bayramı evdə keçirmək istəyənlər üçün araşdırma aparıb.
Yeni il süfrəsini bir qayda olaraq “paytaxt” salatı, plov, yarpaq dolması, ləvəngi, meyvələr, cürbəcür spirtli və spirtsiz içkilər bəzəyir.
Bu yeməklər üçün ən azı 56 manat xərclənir. Əlavə xərclər üçün isə 50-70 manata qədər pul tələb olunur. Belə ki, 4 üzvlü ailə üçün plov 20-25 manat, yarpaq dolması və toyuq ləvəngisi müvafiq olaraq 10 və 13 manata başa gəlir. Salatın hazırlanması isə 8 manat tutur.
Hər meyvədən yarım kilo aldığımızı hesablasaq, alma – 1,5 manat, armud – 3 manat, mandarin – 1,5 manat, portağal – 2 manat, banan 2 manat, ananas – 4 manatdır. Ümumilikdə, 4 nəfərlik ailənin meyvə almağa minimum 12 manat pulu çıxır.
Ümumilikdə içkilər 24,5 manata baş gəlir. Bura 1,5 manatdan olan 3 meyvə şirəsi və 20 manatlıq şampan şərabı daxildir.
Bu rəqəmlərin üzərinə şam ağacı, bəzək əşyaları əlavə etsək məbləğ bir az da artır. 150 santimetr hündürlüyündə olan şam ağaclarının qiyməti 70-100 manat, 12 ədədli yeni il oyuncaqlarının qiyməti 3 manatdan başlayır.
Yuxarıda qeyd etdiklərimizi nəzərə alaraq nəticə çıxara bilərik ki, 4 nəfərlik ailə 1 günlük bayram süfrəsi üçün minimum 180-185 manat xərcləməlidir.
