Özünüməşğulluq proqramı çərçivəsində ötən həftə 400-ə yaxın işsiz və işaxtaran şəxsə mal və materiallar formasında aktivlər təqdim edilib və onlar üçün kiçik bizneslər yaradılıb. Bu barədə 28 dekabrda Dövlət Məşğulluq Agentliyinin saytında məlumat verilib.
Bu şəxslərin böyük hissəsini şəhid ailələrinin üzvləri və müharibə iştirakçıları təşkil edib.
Özünüməşğulluq proqramında iştirak etmək üçün Dövlət Məşğulluq Xidmətinin yerli orqanlarında qeydiyyatdan keçmək lazımdır. Proqrama cəlb olunan şəxslər üçün təlimlər keçirilir və kiçik biznesin təşkili və idarə olunması üzrə bilik və bacarıqlar öyrədilir. Sözügedən təlimləri uğurla başa vuran şəxslər biznes planlarına uyğun aktivlərlə təmin olunurlar. Bu aktivlər 2 il müddətinə müqavilə əsasında verilir. Müqavilə müddətinin sonunda təqdim edilmiş aktivlər həmin şəxsin mülkiyyətinə verilir.
