Zaqatala rayonunda qeysəriyyə əməliyyatından sonra ana ölümü baş verib. Bu barədə 22 mart tarixində Apa məlumat verib.
Məlumata əsasən, rayonun 1995-ci il təvəllüdlü Çökəkoba kənd sakini uşaq dünyaya gətirmək üçün martın 18-də Zaqatala RMX-nın doğum şöbəsinə müraciət etmişdir. Sözügedən şəxs martın 19-da əməliyyatla qız uşağı dünyaya gətirəndən bir gün sonra dözülməz ağrıları olduğunu bildirib. Lakin həkimlər xəstənin yaxınlarına bunun ciddi bir hal olmadığını bildiriblər.
Daha sonra qadının vəziyyətinin ağırlaşdığını görən həkimlər martın 21-i səhər saatlarında onu reanimasiyaya yerləşdiriblər. Bundan bir neçə saat sonra ana dünyasını dəyişib.
Məlumata görə, dünyaya gələn uşağın vəziyyəti normaldır.
Faktla bağlı araşdırma aparılır.
