Vətəndaşa qarşı dələduzluq etməkdə təqsirləndirilən Tələt Əlizadəyə hökm oxunub. Bu barədə 6 sentyabr tarixində Report xəbər verib.
Bakı Ağır Cinayətlər Məhkəməsinin hakimi Azad Məcidovun sədrliyi ilə keçirilən prosesdə elan edilən hökmə əsasən, o, 6 il müddətinə azadlıqdan məhrum edilib.
Təqsirləndirilən şəxs məhkəmə zalında həbs edilib.
İttiham aktına görə, Tələt Əlizadə zərərçəkmiş şəxs qismində tanınan Tural Hüseynovun etibarından sui-istifadə edərək ona qarşı dələduzluq edib. Ondan borc olaraq ümumilikdə 150 min manat pul alan T. Əlizadə söz verib ki, əgər borcu qaytara bilməzsə, paytaxtdakı evlərindən birini verəcək.
Lakin T.Əlizadə zərərçəkmiş şəxsə olan borcu ödəməyib və hüquq-mühafizə orqanları tərəfindən saxlanılıb.
Ona qarşı Cinayət Məcəlləsinin “Dələduzluq külli miqdarda ziyan vurmaqla törədildikdə” maddələri ilə ittiham irəli sürülüb.
