Azərbaycanda 2018-2021-ci illərdə 17 mənzili 36 nəfərə satan mənzil tikinti kooperativinin sədri həbs edilib. Bu barədə Report mayın 6-da Baş Prokurorluğa istinadən məlumat verib.
“Star-M” MTK-nın təsisçisi və sədri, eləcə də “ŞANS” MTK-nın faktiki rəhbəri olmuş Məhərrəm Məhərrəmov 17 mənzili saxta müqavilə və maliyyə arayışlarının tərtib edilməsi yolu ilə 36 nəfərə satıb. O, həmçinin satılması qanunvericiliklə qadağan edilmiş 7 qeyri-yaşayış sahəsini mənzil qismində eyni üsulla 14 şəxsə satıb. Saxlanılan şəxs vətəndaşların ümumilikdə 3 milyon 166 min manat məbləğində pul vəsaitini ələ keçirib.
Məhərrəm Məhərrəmov “dələduzluq külli miqdarda ziyan vurmaqla törədildikdə”, “vəzifə səlahiyyətlərindən sui-istifadə ağır nəticələrə səbəb olduqda” və “vəzifə saxtakarlığı” maddələrilə ittiham olunub. Onun barəsində həbs qətimkan tədbiri seçilib.
Cinayət işi üzrə araşdırma davam edir.
