Quba rayonu, Tüləkəran bələdiyyəsinin 2015-2019-cu illərdəki sədri Laləzar Heybətovanın cinayət işinin ibtidai istintaqı tamamlanıb. Bu haqda iyunun 2-də Baş Prokurorluq məlumat paylaşıb.
Cinayət işi baxılması üçün aidiyyəti üzrə Quba rayon məhkəməsinə göndərilib.
L.Heybətova öz qulluq mövqeyindən tamah niyyətilə istifadə edərək 16 min 547 manat məbləğində vəsaiti mənimsəyib. O, guya bələdiyyə ərazisində yaşayan şəxslərə maddi yardımın ayrılmasına, yol təmir-bərpa işlərinin görülməsinə görə xidmət haqqının ödənilməsinə dair rəsmi sənədlərə yalan məlumatlar daxil edib.
Sabiq bələdiyyə sədri “təkrar dələduzluq”, “şəxs tərəfindən öz qulluq mövqeyindən istifadə etməklə xeyli miqdarda ziyan vurmaqla mənimsəmə”, “vəzifə səlahiyyətlərindən sui-istifadə” və digər maddələrlə ittiham olunub.
