Ağdamda Bakının İçərişəhərinə bənzər 22,5 hektarlıq mərkəzi yer yaradılacaq. Bu haqda dekabrın 9-da Prezidentin xüsusi nümayəndəsi Emin Hüseynov məlumat verib.
Məlumata əsasən, orada Pənahəli xanın imarət kompleksi, Çörək muzeyi, Dram Teatrı və Zəfər Muzeyi kompleksi inşa ediləcək.
Mayın 28-də təməli qoyulan kompleks üç komponentdən ibarət olacaq. Kompleks İşğal Muzeyindən başlayaraq Zəfər Muzeyində bitəcək. Onların arasında 18 hektarlıq Memorial Bağ yaradılacaq. Sözügedən bağda xarabalıqlar və dağıdılmış binalar olduğu kimi saxlanılacaq.
Birinci və İkinci Qarabağ müharibələrinin tarixini nümayiş etdirmək üçün “augmented reality – gücləndirilmiş virtual reallıq” texnologiyası ilə mobil tətbiqlər istifadə olunacaq.
Bağın sonunda Zəfər Muzeyi, Bayraq Meydanı və Zəfər arenası yerləşəcək. Zəfər Muzeyində hər bir kənd və şəhərin azad edilməsi haqqında faktlar təqdim ediləcək.
Geniş infrastruktura malik guşədə İmarət stadionunun tikintisi planlaşdırılır. İdman məhəlləsində yalnız futbol stadionu deyil, digər idman növləri üçün də qapalı-açıq zallar nəzərdə tutulub. Hazırda burada layihələndirmə işləri davam edir.
