Abşeronda sudan uçotsuz və sayğacdankənar xətlərdən istifadə halları aşkarlanıb. Bu barədə dekabrın 10-da Azərsu məlumat yayıb.
Xırdalanda yaşayış evində sakinlər bina paylayıcı su şəbəkəsinə qanunsuz olaraq qoşulub. Öz növbəsində sakinlər istifadə etdikləri suyun haqqını binanı idarə edən şəxslərə ödədiklərini bildiriblər. Binanın birinci mərtəbəsində yerləşən “Zeytun” marketin qanuni sayğacı olsa da, obyekt sahibi qanunsuz olaraq mənzillərə çəkilmiş xətdən su götürüb.
Ceyranbatan su anbarına yaxın hissəsində yerləşən fermer təsərrüfatının da suyu taladığı üzə çıxıb. Dəfələrlə xəbərdarlıq edilməsinə və su təchizatının dayandırılmasına baxmayaraq sudan qanunsuz istifadə davam edib.
Eyni zamanda Masazır qəsəbəsində bir neçə fərdi həyət evinin sudan qanunsuz istifadə etdiyi məlum olub.
Qurum bildirib ki, özbaşına çəkilmiş xətlər ləğv ediləcək, belə halları təkrar törədənlərlə bağlı hüquq-mühafizə orqanlarına müraciət olunacaq.
Qeyd edək ki, 2021-ci ilin yanvar-noyabr aylarında içməli sudan qanunsuz istifadə ilə bağlı “Azərsu” ASC üzrə 13 993 fakt aşkarlanıb.
