Abşeron rayonunda özünü “Azərsu” ASC-nin əməkdaşı kimi təqdim edərək vətəndaşları aldadan şəxs ifşa edilib. Bu haqda məlumat iyunun 13-də qurumun saytında yerləşdirilib.
Həmin şəxs abonentdən debitor borcun ləğv edilməsi və su sayğacının dəyişdirilməsi müqabilində 80 manat tələb edib. Abonent bununla əlaqədar Abşeron Sukanal İdarəsinə müraciət edib.
“Azərsu” ASC vətəndaşlara belə hallarda həmin şəxslərdən vəsiqə tələb etmələrini və nağd pul ödəməmələrini tövsiyə edir. Bununla bağlı 955 Zəng Mərkəzinə məlumat vermək olar.
Qeyd edilib ki, əhali abonentləri üçün sayğaclar dövlət vəsaiti hesabına quraşdırılır və işlək vəziyyətdə olmadıqda yenisi ilə əvəz edilir. Sayğacın dəyişdirilməsi isə debitor borcun silinməsinə və ya azaldılmasına heç bir təsir etmir.
