Dünən, dekabrın 6-da Şamaxıda “İşğaldan azad olunmuş ərazilərin innovativ inkişaf imkanları” mövzusunda konfrans keçirilib. Bu barədə 7 dekabr tarixində İqtisadiyyat Nazirliyinin rəsmi səhifəsi məlumat verib.
Keçirilən tədbirin məqsədi işğaldan azad olunmuş ərazilərdə görülən bərpa-quruculuq işləri ilə bağlı müzakirələrin aparılması idi.
Konfransda çıxış edən iqtisadiyyat nazirinin müavini Sahib Ələkbərovun sözlərinə görə, Qarabağın “Yaşıl zona” elan edilməsi, sənaye parkları və aqroparkların yaradılması, həmçinin bu ərazilərdə fəaliyyət göstərəcək sahibkarlar üçün nəzərdə tututlan güzəştlər regionun dirçəldilməsinə böyük imkanlar yaradacaq. Nazir müavini qeyd edib ki, işğaldan azad edilmiş ərazilərdə sahibkarlıq fəaliyyətinin həyata keçirilməsi ilə bağlı çoxsaylı müraciətlər daxil olur. İnvestisiya layihələrinin prioritetliyi təhlil edilir, potensial layihələr müəyyənləşdirilir və informasiya bazasına daxil olunur.
Tədbirdə ADA Universiteti və AMEA-nın nümayəndələri işğaldan azad edilmiş ərazilərimizin bərpasının maliyyələşdirilmə mexanizmləri və sosial bizinesin idarə edilməsi mövzularında məruzələri dinlənilib, müzakirələr aparılıb.
