Naftalanda kişi arvadı ilə iş yoldaşının xəyanətinin şahidi olub.
İnsanoid.com-un əldə etdiyi məlumata görə, hadisənin istintaqı Naftalan Şəhər Məhkəməsində keçirilib.
Təqsirləndirilən Cavidin (ad şərtidir) birlikdə yaşadığı arvadı, zərərçəkmiş Sevda (ad şərtidir) ilə aralarında mübahisə yaranıb. Mübahisənin ilk başlanğıc səbəbi həyat yoldaşının sualı olub. Belə ki, Cavid oğlu Alim ilə birlikdə Qaşaltı kəndi yoluna skuter sürmək və gəzmək üçün çıxıblar. Bu zaman arvadı Sevda ona zəng edərək “haradasınız, nə vaxt gəlirsiniz” sualını verib. Daha sonra Cavid oğlu ilə çay içmək üçün restoranda əyləşdiyi müddətdə arvadı bir neçə dəfə zəng edərək bu tərzdə suallar verib.
Çay içdikdən sonra Cavid oğlu ilə birlikdə bağ evlərinə gedib. Evə yaxınlaşanda qapının çöldən açıq olduğunu, lakin darvazanın içəri tərəfdən bağlandığını görüb. Kiminsə oğurluğa girdiyini düşünüb, yoldaşına zəng edib. Sevda evdə olduğunu desə də, qapını 20 dəqiqə sonra açıb. O, evə daxil olduqdan sonra otaqda başqa bir şəxsin olduğundan şübhələnib, lakin heç bir söz deməyib. Evi axtararkən kişi ətrinin qoxusunu hiss edib.
Yataq otağının işığını yandıranda çarpayının yan tərəfində yerə bir nəfərin uzandığını görüb. Yaxınlaşarkən həmin şəxsin kişi olduğunu görüb. Bununla dava başlayıb. Arvadını və kişini döyüb.
Cavid Azərbaycan Respublikası CM-nin 128-ci (sağlamlığa zərbə vurma) maddəsi ilə təqsirləndirilib.
Məhkəmə iclasında təqsirləndirilən Cavid özünü təqsirli bilərək ifadəsində göstərib:
“Evə girəndə hiss elədim ki, evdə yad kişi var. Axtaranda yatağın altında gizlənən həmin kişinin qonşudakı Anar olduğunu gördüm. Əsəbiləşib hər ikisini də döydüm. İkisi də xəyanət etmədiklərini deyirdilər. Arvadımın sözünə görə, guya Anarı evin təmiri üçün çağırıb. Anar da deyir ki, söhbət etmək üçün gəlib”.
Məhkəmə baxışında zərərçəkmiş Sevda ifadəsində deyilənlərin yalan olduğunu, xəyanət etmədiyini vurğulayıb:
“Həyət evimizin təmirə ehtiyacı var idi. Bu məqsədlə keçmiş iş yoldaşım Anara zəng edib, qaynı Elbarizə təmir üçün məlumat verməyini xahiş etdim. Hətta Anarın arvadının da bu zəngdən xəbəri var idi. Qaynının vaxtı olmadığı üçün Anar özü gəlib evə baxdı. Cavidə Anarın gəldiyini demədim. O gəldikdən 5 dəqiqə sonra oğlumla ərim içəri girdi. Hər şeyi səhv anladı, məni şillə, təpiklə döydü. Ondan şikayətçiyəm, ziyanı ödəməyib”.
Məhkəmənin yekun qərarı ilə Cavidə aylıq qazancından dövlət nəfinə 20 (iyirmi) faiz məbləğdə pul vəsaiti tutulmaqla, 1 (bir) il müddətə islah işləri cəzası təyin edilib.
Fidan İlqar
