Bu gün, mayın 17-də Bakıda Avropa İttifaqı-Azərbaycan biznes forumu keçirilib. Bu barədə İqtisadiyyat Nazirliyinin rəsmi səhifəsində məlumat verilib.
Tədbirdə çıxış edən Avropa İttifaqının (Aİ) Azərbaycandakı nümayəndəliyinin rəhbəri səfir Peter Mixalko 2021-ci ildə tərəflər arasında ticarət dövriyyəsinin 15 milyard dollardan çox olduğunu qeyd edib. Səfir işğaldan azad olunmuş ərazilərimizin bərpası və quruculuq işlərində iştirakda maraqlı olduqlarını bildirib.
İqtisadiyyat naziri Mikayıl Cabbarov Aİ-yə üzv olan ölkələri işğaldan azad edilmiş ərazilərimizdə aparılan infrastruktur və tikinti layihələrində fəal iştiraka dəvət edib. Bildirilib ki, Ağdam və Araz Vadisi İqtisadi Zonası sənaye parkları işğaldan azad edilmiş ərazilərimizin ölkə iqtisadiyyatına reinteqrasiyasını daha da sürətləndirəcək. Nazir qeyd edib ki, 2026-cı ilədək Azərbaycanda KOB-ların ÜDM-də payı 60%-ə, məşğulluqda 70%-ə və qeyri-neft ixracında 40%-ə çatdırılması qarşıya hədəf kimi qoyulub.
“Aİ Biznes Mühiti Hesabatı 2021” hesabatına əsasən, ölkəmizdə təmsil olunan Aİ ölkələri şirkətlərinin 80%-i iqtisadi fəaliyyət üçün Azərbaycanı seçmək, 53%-i isə ölkəmizdə biznes fəaliyyətlərini genişləndirmək niyyətini bildiriblər. Aİ ölkələri şirkətlərinin 54%-i Qarabağ və Şərqi Zəngəzur iqtisadi rayonlarına investisiya yatırmaqda maraqlıdırlar, 14%-i isə artıq investisiya layihələrində iştirak edirlər.
Qeyd edək ki, tədbirdə hər iki tərəfdən rəsmi şəxslər, beynəlxalq təşkilatların nümayəndələri və sahibkarlar iştirak ediblər.
