Azərbaycan Respublikasının ərazisinə gətirilən aksizli malların aksiz dərəcələrində dəyişikliklər edilib. Bu barədə 14 mart tarixində Qərar imzalanıb.
Qərara əsasən, tərkibində tütün olan siqaretlərin, eləcə də tərkibində tütün əvəzləyicisi olan siqaretlərin 1 000 ədəd üçün aksiz dərəcəsi 43 manatdan 46,5 manata qaldırılıb.
Həmçinin istehlak olunan tütün və tütün məhsullarının 1 000 ədəd üçün aksiz dərəcəsi 12,9 manatdan 14 manata qaldırılıb.
Dəyişikliklərə əsasən, qəlyan üçün tütünlər və tütün əvəzləyiciləri, istehsal məqsədli tütünlər istisna olmaqla digər çəkməli tütünlər, “homogenləşdirilmiş” və ya “bərpa edilmiş” tütünlər, çeynənilən və ya buruna çəkilən tütünlərin 1 kiloqramına görə aksiz dərəcəsi 30 manat müəyyənləşdirilib.
Birdəfəlik istifadə olunan elektron qəlyan, siqaret üçün isə aksiz dərəcəsi 0,25 manat müəyyən olunub.
Eyni zamanda, üzüm çaxırının və ya üzüm puçallarının distillə edilməsi nəticəsində alınan spirtli tinkturalar üçün aksiz dərəcəsi 1 litrə görə 7,2 manatdan 8 manata, viski, rom və digər spirtli tinkturalar, şəkər qamışının qıcqırdılmış məhsullarının qovulması nəticəsində alınan, cin və ardıc tinkturası, araq, likörlər və digər spirtli içkilər üçün 1 litrə görə 11,2 manatdan 12 manata qaldırılıb.
Qərar dərc edildiyi gündən 30 gün sonra qüvvəyə minəcək.
