Birləşmiş Ərəb Əmirliklərinin Dubay şəhərində 9 may tarixində start götürən “ATM Dubai 2022” beynəlxalq sərgisində Azərbaycan milli stendlə təmsil olunur. Bu barədə 10 may tarixində Dövlət Turizm Agentliyinin rəsmi səhifəsində məlumat verilib.
Məlumata əsasən, tədbirdə “Azərbaycan Hava Yolları” QSC, Naxçıvan Turizm Departamenti, eləcə də 31 yerli turizm şirkəti iştirak edir. Sərgidə ziyarətçilərə Azərbaycanın müxtəlif regionlarının, eləcə də işğaldan azad olunan ərazilərin turizm imkanları tanıdılır, Yaxın Şərq ölkələrindən Azərbaycana səfər imkanları haqqında geniş məlumat verilir.
Qeyd edək ki, bu, sayca 29-cu sərgidir. Tədbir mayın 12-dək davam edəcək.
