Belarus Azərbaycana ildə 50-yə yaxın texnika tədarük edəcək. Bu haqda mayın 25-də “Qomselmaş” ASC-yə istinadən APA məlumat yayıb.
Belə ki, şirkət Azərbaycanın Gəncə Avtomobil Zavodu ilə əməkdaşlığı bərpa etməyi planlaşdırır. Hazırda azərbaycanlı tərəfdaşların sifarişi ilə yeni Belarus kombaynı istehsal olunmağa başlayıb. Bildirilib ki, ilin sonunadək texnika Belarusda sınaqdan keçiriləcək və gələn ildən Azərbaycana tədarük ediləcək.
“Qomselmaş” holdinq kənd təsərrüfatı texnikasının ən iri istehsalçılarından və qlobal kənd təsərrüfatı maşınları bazarında liderlərdən biridir. Holdinqin kombaynları Rusiya, Ukrayna, Qazaxıstan, Çexiya, Slovakiya, Rumıniya, Bolqarıstan, Baltikyanı ölkələr, Argentina, Braziliya, Çin, Cənubi Koreya və digər ölkələrdə fəaliyyət göstərir.
