Azərbaycan dili (dövlət dili kimi) fənni üzrə iyunun 12-də keçirilən test imtahanının nəticələri elan olunub. Bu barədə 20 iyun tarixində Dövlət İmtahan Mərkəzi məlumat verib.
Məlumata əsasən, cari ilin 12 iyun tarixində buraxılış imtahanı çərçivəsində ümumi (9 illik) və tam (11 illik) orta təhsil səviyyəsi üzrə 2022-ci il mayın 8-də keçirilən Azərbaycan dili imtahanında iştirak etməyən cari ilin məzunları və ali və ya orta ixtisas təhsil müəssisələrinə qəbul olmaq üçün sənəd verən, lakin mayın 8-də keçirilən imtahanda iştirak edib “qeyri-məqbul” qiymət alan cari və əvvəlki illərin abituriyentləri üçün Azərbaycan dili fənni üzrə test imtahanı təşkil olunub.
İmtahan nəticələri iyunun 20-də saat 17:36-dan etibarən DİM-in internet səhifəsində yerləşdiriləcək. Bildirilib ki, şagirdlər 8 rəqəmli şagird kodu və şəxsiyyəti təsdiq edən sənədin nömrəsindən (və ya FİN kodundan), abituriyentlər isə şəxsi kabinetinin istifadəçi adı və parolundan istifadə etməklə öz imtahan nəticələri ilə tanış ola bilərlər.
Qeyd olunub ki, şagirdlərin imtahanda toplaya biləcəkləri maksimum bal 100 baldır. Həmçinin bildirilib ki, sözügedən imtahanın nəticəsi şagirdin yekun attestasiya sənədinə yazılacaq.
Ali və orta ixtisas təhsili müəssisələrinə qəbul imtahanını Azərbaycan dilindən fərqli dildə verən cari və əvvəlki illərin abituriyentləri isə imtahanda 30 bal toplaya bilərlər. Bildirilib ki, abituriyentin “məqbul” alması üçün onun topladığı bal 15-dən az olmamalıdır.
Sözügedən imtahan nəticələri ilə bağlı müraciətlərə baxılması üçün 22 iyun tarixindən etibarən onlayn ("Zoom" proqramı və ya telefon əlaqəsi vasitəsilə) apellyasiya prosesi təşkil ediləcək. Apellyasiya komissiyasına müraciət etmək istəyənlər 21-23 iyun tarixlərində DİM-in internet saytında yerləşdirilən elektron ərizəni dolduraraq qeydiyyatdan keçə bilərlər. Həmiçinin qeyd olunub ki, göstərilən müddət ərzində qeydiyyatdan keçməyənlər sonradan apellyasiya üçün müraciət edə bilməyəcəklər.
