Keçən il oktyabrın 1-dən Azərbaycanda kinoteatrların fəaliyyəti bərpa olunub. Xatırlayırsınızsa, pandemiya başlayandan kinozallar bağlanmışdı. 8 aydır fəaliyyət göstərməklərinə baxmayaraq, izləyicilər yerli kinoteatr şəbəkələrindən narazıdırlar.
Bizə ünvanlanan əsas problemləri nəzərdən keçirtdik və əmin olmaq üçün özümüz də həm ParkCinema-ya, həm də CinemaPlus-a kino izləməyə yollandıq.
Rastlaşdığımız əsas problemlər:
- Filmlərin Azərbaycan dilində dublyaj/altyazı ilə nümayiş olunmaması. Düzdür, bəzi seanslarda (müqayisə üçün, “Doktor Strenc”in 123 seansından cəmi 21-i) kinolar Azərbaycan dilində altyazı ilə göstərilir, digərləri isə tam rus dilində və ya rus dilli altyazı ilə nümayiş olunur. IMAX, Laser, DolbyAtmos formatında filmləri rus dilini bilmədən izləyə bilməyəcəksiniz, çünki heç altyazı belə yoxdur.
- Azərbaycan dilində altyazı ilə olan filmlər isə başqa dərddir. Kino izləyərkən gözə batan qrammatik səhvlər dəfələrlə sosial şəbəkələrdə müzakirələrə səbəb olub.
- Qoyulan yaş məhdudiyyətinə heç kəs nəzarət etmir. 16+ kateqoriyalı kinolarda 6-7 yaşlı uşaqları görmək adi hala çevrilib. Azyaşlılar isə öz kefində zalda qaçır, gülür, qışqırır. Təbii ki, buna da nəzarət edən olmur.
- “Kinoteatra qida və içki məhsullarını gətirmək qadağandır” yazılsa da, kassada alınan yemək və içkiləri zala keçirtməyə icazə verilir. Lakin eyni məhsulu marketdən ikiqat ucuz qiymətə alıb gətirsəniz və bunu nəzarətçi görsə, “qadağa qüvvəyə minir”. Sözsüz, nəzarətçi görmədən keçirə bilsəniz, heç bir çətinlik yaranmayacaq.
- Daha bir absurd qayda - kinoteatra alkoqollu içkilər gətirmək olmaz, amma kassada pivənin çeşid-çeşid növlərini ala bilərsiniz. Özünüzlə gizli gətirdiklərinizi də heç kəs yoxlamayacaq. Necə deyərlər, bacarana can qurban.
Karantindən sonra biletlərin və kassada satılan qida və içkilərin qiyməti qalxsa da, xidmət sahəsində heç bir dəyişiklik nümayiş olunmur.
Başqa hansı problemləri qeyd edə bilərsiniz?
