Dünən, mayın 18-də Bakıda Azərbaycan-Litva biznes forumu keçirilib. Bu barədə 18 may tarixində İqtisadiyyat Nazirliyinin rəsmi səhifəsində məlumat verilib.
Heydər Əliyev mərkəzində keçirilən tədbirin açılışında hər iki ölkənin dövlət başçıları iştirak edib. Forumda çıxış edən Azərbaycan Respublikasının Prezidenti İlham Əliyev Azərbaycanda biznes mühitinin investorlar üçün əlverişli olduğunu qeyd edib. Dövlət başçısı ölkə iqtisadiyyatının inkişafı, yeni layihələrin icrası barədə məlumat verib. Bildirilib ki, xarici borc ölkənin ümumi daxili məhsulunun yalnız 12,5%-i həcmindədir və hədəf onu 10%-i həcminə qədər azaltmaqdır. Həmçinin qeyd edilib ki, işsizlik səviyyəsi 5-6%-ə qədər azalıb: “Lakin bunu aşağı səviyyədə saxlamaq üçün biz hər il yeni iş yerləri açmalıyıq. Çünki Azərbaycanın əhalisinin sayı, 30 il əvvəl müstəqilliyimiz əldə olunandan bu günə qədər 7 milyondan 10 milyona qədər artmışdır və indi də artmaqdadır”.
Litvanın Prezidenti Gitanas Nauseda öz çıxışında qeyd edib ki, onun məqsədi iki ölkənin iqtisadi, mədəni, siyasi və sosial əlaqələrini yenidən canlandırmaqdan, onları daha sıx və uzunmüddətli etməkdən ibarətdir. O, Azərbaycanın işgüzar dairələrini bu ilin ikinci yarısında Litvaya səfərə dəvət edib.
Tədbirdə iki ölkə arasında sənədlərin imzalanması mərasimi olub. “Beynəlxalq yol nəqliyyatı Sazişi”, “Azərbaycan Respublikasının Ticarət və Sənaye Palatası ilə Litva Respublikasının Ticarət, Sənaye və Sənətkarlıq Palataları Assosiasiyası arasında Əməkdaşlıq Sazişi”, “Azərbaycan Respublikasının Kiçik və Orta Biznesin İnkişafı Agentliyi (KOBİA) ilə Litva Respublikasının Ticarət, Sənaye və Sənətkarlıq Palataları Assosiasiyası arasında Əməkdaşlıq Memorandumu”, “Azərbaycan Respublikasının İxracın və İnvestisiyaların Təşviqi Agentliyi - AZPROMO ilə Litva İnnovasiya Agentliyi arasında Əməkdaşlıq Memorandumu”, “Azərbaycan Respublikasının İxracın və İnvestisiyaların Təşviqi Agentliyi - AZPROMO ilə Litva Respublikası Sənayeçilər Konfederasiyası arasında Əməkdaşlıq Memorandumu”, “Azərbaycan Respublikası Sahibkarlar (İşəgötürənlər) Təşkilatları Milli Konfederasiyası ilə Litva Respublikası Sənayeçilər Konfederasiyası arasında Əməkdaşlıq Müqaviləsi” imzalanıb.
