Azərbaycan Ordusunun Kəlbəcər rayonunun Zəylik və Yellicə yaşayış məntəqələrində yerləşən mövqeləri atəşə tutulub. Bu barədə iyunun 3-də Müdafiə Nazirliyi məlumat yayıb.
Atəş Ermənistan silahlı qüvvələrinin Basarkeçər rayonunun Yuxarı və Aşağı Şorca yaşayış məntəqələrində yerləşən mövqelərindən açılıb. Atışma iyunun 2-si axşam saatlarından iyunun 3-ü gecə saatlarınadək davam edib.
Azərbaycan Ordusu tərəfindən cavab tədbirləri görülüb. Şəxsi heyət və texnika baxımından itki yoxdur.
“Ermənistan öz ictimaiyyətinin diqqətini daxildə baş verən proseslərdən yayındırmaq üçün sərhəddə vəziyyəti gərginləşdirməyə çalışır. Qarşı tərəfin törətdiyi təxribatların nəticələrinə görə bütün məsuliyyət bu ölkənin hərbi-siyasi rəhbərliyinin üzərinə düşür”, - deyə nazirlikdən əlavə edilib.
Qeyd edək ki, mayın 31-də Kəlbəcərin Zivel yaşayış məntəqəsi, iyunun 1-də Tovuzun Ağdam və Kəlbəcərin Zəylik yaşayış məntəqələri atəşə tutulmuşdu.
