Azərbaycanın Xarici İşlər Nazirliyi iyunun 28-də Ermənistanın baş naziri Nikol Paşinyanın ötən gün onlayn mətbuat konfransında söylədikləri fikirləri şərh edib.
Azərbaycan ərazilərini 30 ilə yaxın işğal altında saxlayan ölkənin baş naziri iyunun 27-də Azərbaycanı blokada siyasəti yürütməkdə ittiham edib.
XİN-in verdiyi məlumata görə, Azərbaycan müharibə istəsəydi, Ermənistan tərəfindən 30 ildə dağıdılan ərazilərdə yenidənqurma və bərpa işləri aparmazdı.
Azərbaycan ərazilərini azad etdikdən sonra iki dövlət arasında münasibətlərin normallaşması təşəbbüskarı olub. Prezident İlham Əliyev isə sülh sazişinin imzalanmasını təklif edib.
Həmçinin Paşinyan “Azərbaycan tərəfinin ən azı bir halda görüşün keçirilməsini boykot etdiyini” söyləyib. Lakin Ermənistan müxtəlif bəhanələr və təxribatlarla bir çox görüşləri təxirə salıb.
Bundan əlavə, Ermənistan üçtərəfli bəyanatın icrasını pozur: Azərbaycana diversant qüvvələr göndərir və kommunikasiyaların açılmasını uzadır.
“Ermənistan həqiqətən sülh istəyirsə, öz siyasi iradəsini ortaya qoyub sülh istiqamətində konkret addımlar atmalıdır”, - deyə Azəbaycan XİN tərəfindən vurğulanıb.
